بداية - تحدي 29 يوم

 

أنى امير عبد المطلب خريج هندسة نفط من الجامعة التكنولوجيا عام 2015 اشتغلت في الصناعة النفطية من 2015 ولحد الان وحاليا مقدم على ماجستير إدارة الاعمال في احدى الجامعات الكندية.

جان عندي فضول من زمان انوا واحد اشون يكدر يسوي برنامج او لعبة وجان بالنسبة الية شي غامض وكأنما سحر.بلشت اتعلم بوقتهة أيام رابع اعدادي Visual Basic وسويت كم برنامج بسيط.وبعدهة تركت ورجعت بعد التخرج من الكلية قبل لا أبدي بشغلي الخاص بالنفط تعلمت تطير العاب ب unity وهم تركت لان انشغلت بشغلي واستمريت لغاية وقت قريب.

وخلال هالفترة جنت اتابع سوق العمل والتطور بالتكنولوجيا وشفت انوا شغل الخاص بالنفط مو بكل مكان تكدر تشتغلة ومو بكل دولة ويعتمد على سعر البرميل والعرض والطلب ويتأثر بسرعة وهواية ناس فقدوا شغلهم بسبب هالشي.

فقررت اطور نفسي بمجال ثاني وبما إني جدا متابع ومحب للتكنولوجيا فردت أكمل بالبرمجة ولانوا هو مجال كشغل متوفر أكثر من شغل النفط وأيضا أقرب الية من النفط فبحثت وقارنت بين تطوير تطبيقات الهواتف وبرمجة المواقع وأيضا الألعاب وشفت انوا الأنسب الية والأقرب هو تطوير التطبيقات.

وبعدها كملت بحث بين أنواع التقنيات المستخدمة بتطوير التطبيقات ومنها Flutter وXamarin وReact native و غيرهم ولكن ذولة ال 3 أشهر الموجودين والمجتمع الخاص بيهم والدعم كبير مقارنة بالبقية وبعدهة قررت ان اختار Flutter.